ព្រះសីហនុ៖ អភិបាលខេត្តព្រះសីហនុ លោក គួច ចំរើន បានបង្ហោះវីដេអូនាព្រឹកថ្ងៃទី២០ ខែកក្កដានេះ ដោយអនុញ្ញាតឱ្យភ្ញៀវទេសចរអាចធ្វើដំណើរទៅដីកោះនានាតាមរយៈទូកកាណូតប្រកបដោយសុវត្ថិភាព ប៉ុន្តែត្រូវបង្កើនការប្រុងប្រយ័ត្នឱ្យបានខ្ពស់។ លោក គួច ចំរើន អនុញ្ញាតឱ្យធ្វើដំណើរតាមផ្លូវទឹកនេះក៏ដោយសារតែយល់ឃើញថាអាកាសធាតុក្នុងខេត្តព្រះសីហនុមានភាពល្អប្រសើរឡើងវិញ។
ជាមួយគ្នានេះដែរលោក គួច ចំរើន ក៏បានអនុញ្ញាតឱ្យអ្នកនេសាទចេញទៅនេសាទនៅសមុទ្របានជាធម្មតាវិញ។ ប៉ុន្តែលោកណែនាំថា អ្នកនេសាទគួរតែចេញទៅនេសាទតែមួយថ្ងៃបានហើយ ត្រូវត្រឡប់មកដីគោកវិញ។
លោកបានណែនាំដល់អ្នកធ្វើដំណើរតាមទូកកាណូតនីមួយៗត្រូវតែពាក់អាវពោងរាល់ពេលធ្វើដំណើរតាមផ្លូវទឹកដើម្បីជៀសវាងហានិភ័យគ្រោះថ្នាក់ជាយថាហេតុណាមួយ។
លោកអភិបាលខេត្ត ក៏បានណែនាំឱ្យអាជ្ញាធរ កងកម្លាំងមានសមត្ថកិច្ច ត្រូវត្រៀមលក្ខណៈជាប់ជាប្រចាំ ដើម្បីចេញអន្ដរាគមន៍ក្នុងករណីចាំបាច់ណាមួយ ជាពិសេសត្រូវនៅជាប់ជាមួយប្រជាពលរដ្ឋជានិច្ច ខ្លាចក្រែងពួកគាត់ត្រូវការជំនួយក្នុងករណីបន្ទាន់។
កាលពីថ្ងៃចុងសប្តាហ៍មុន លោក គួច ចំរើន បានស្នើឱ្យផ្អាកធ្វើដំណើរតាមផ្លូវសមុទ្រទៅកោះនានា ឬទៅនេសាទ ឬចេញត្រឡប់ទៅដីគោកវិញ ជាបណ្តោះអាសន្នសិន ព្រោះតែមានខ្យល់បោកបក់ និងរលកខ្ពស់ៗ។ អភិបាលខេត្តព្រះសីហនុបានបញ្ជាឱ្យបញ្ចេញកប៉ាល់ចំនួន៥គ្រឿងយកទៅដឹកភ្ញៀវទេសចរដែលជាប់គាំងនៅតាមកោះនានាកាលពីថ្ងៃចន្ទនេះ៕
